القنيطرة.. عامل الإقليم يواصل زياراتو الميدانية والساكنة كتعبّر على ارتياحها

ما بقاش نهار كيدوز فمدينة القنيطرة بلا ما يتسجل حضور عامل الإقليم، السيد عبد الحميد المزيد، فواحد من الأوراش التنموية اللي كتهم المدينة. صباح اليوم الأربعاء، مباشرة من بعد الاجتماع اللي دار فعمالة الإقليم حول الاستعدادات للدخول المدرسي 2025 – 2026، توجّه العامل لزيارة ميدانية لوراش تهيئة حديقة ابن خفاجة، أو Petit Jardin بحال ما كيعرفوها القنيطريين. الزيارة حضرو فيها مسؤولين كبار من بينهم مدير الديوان، باشا المدينة، رئيسة المجلس البلدي، والأطر التقنية اللي كتسهر على المشروع. وتم عرض مجموعة من الشروحات حول الأشغال اللي كتشمل إعادة الاعتبار للمساحات الخضراء، تهيئة الممرات، وخلق فضاءات لعب وترفيه للأطفال، مع الحرص على احترام المعايير البيئية الحديثة. ساكنة القنيطرة تابعو هاد التحرك بارتياح كبير، واعتبرو أن الجولات اليومية لعامل الإقليم ماشي مجرد بروتوكول، بل دليل على واحد العناية خاصة بالمدينة وبانتظارات سكانها. هاد المشروع كيبين بوضوح أن السلطات المحلية والمجلس الجماعي كيجمعهم نفس الهدف: بناء قنيطرة أجمل، منظمة، وعندها فضاءات حقيقية للراحة والعيش الكريم.