آدم أفيلال يكتب.. جمهور الرجاء طلاع نْمبر وانْ
جمهور الرجاء طلاع نْمبر وانْ … تحية له و تحية للمنظمين الساهرين على هاد التنقل، والله يدوم هاد المحبة و الأخوة و الصداقة بين الجمهورين و تكون هاد العلاقة المحترمة الراقية بين جميع الجماهير.
كيف كادعرفو … أنا ساكن و عندي المحل حدا الملعب ، يعني ولد الحاومة و مسانس مع الجماهير و عارف كيفاش كادكون الأجواء في المحيط د الملعب هادي سنين …قبل و بعد المبارة كاتكون ديك الجولات خفافية في الدروبة د الحومة، نورمال ولاد الحومة يعملو السربيس عادي …
البارح كان ديك الشي فوق المستوى … الجمهور د الرجاء كان أحسن و أفضل من المستوى المطلوب … و يا ريت كل الجماهير تتخذ هاد الجمهور قدوة في التنقل و في الإنزال ديالو … برابو جمهور الرجاء العظيم …
الرجاويين البارح كانو جالسين في الحومة معانا فحال ولاد الحومة … في السناكات و المطاعم شابرين النوبة ماكاين صدع ماكاين غوات و لا حايحة كولشي بانتظام … المحلات د المواد الغذائية لي كاين في المحيط د الملعب كذلك كولشي بقى فاتح و موالين الحوانت ناشطين ما مرعوبين ما مخلوعين … المخبزات القهاوي و المطاعم كذلك كانو عاديين … هايدة بغينا الجمهور يكون … برابو ليلكم.
هوما الرجاويين الأكثرية فيهم مزيانين لكن البارح كانو زايدين حلاوة ، جاو منظمين و لابسين مزيان ديك الشي هارب بزاف … كاتجبر مجموعات صغيرة متفرقة و كل مجموعة بعيدة على أخرى ،يالاه كايكون غاتنوض شي مشيكلة معهم في شي نقاش (خصوصا مع صحاب لوراق) كاتشوفو كاينسحب و يمشي فحالو بلا مشاكل ، كذلك بعض الناس كبارين د الحومة ماكيفرقوشي بين الجماهير كانو خوفانين كايقولوم نوضو من هنا كاينوضو ضربة واحدة و كايزيدو سمحنا أ الواليد من فوق و كاينساحبو بهدوء.
تحية تطوانية للجماهير الرجاوية … تحية من ولاد المدينة لهاد هاد الجمهور الرجاوي العظيم لي تحرك و شجاع بكل احترام و وقار و سكينة ..
الله يحفظكم آ خوتي ديالي و الله يرفع كل شر و حقد و كراهية من بين الجماهير المغربية كاملة …
حنا ولاد تطوان فرحانين بالغولب لي غلبنا … و فرحانين أكثر بهاد العلاقة الأخوية النمودجية لي كاين بين الرجاء و تطوان … تحية من أعماق القلب و الله يطفيها جمرة بين الخوت اخرين و السلام.
