باشا باشوية بومية يشرف شخصيا الى جانب لجنة اليقظة لتجنب خطر الفيضانات
منذ الساعات الأولى ديال صباح اليوم وبإشراف و حضور مباشر ديال السيد باشا باشوية بومية، تحركات لجنة اليقظة المحلية كانت واضحة وقوية فالميدان، حيث تم القيام بعملية تطهير وتهيئة المجرى المائي اللي كيصب فيه واد تنجيجمت، واحد من النقط الحساسة اللي معروفة بالسيول القوية ملي كتكون التساقطات المطريةكثيرة
هاد التدخل كان استباقي و خصوصا وأن هاد الموقع سبق وخلق قلق للساكنة فسنوات سابقة. السيد الباشا نزل للميدان وتابع الأشغال خطوة بخطوة وعطى تعليمات دقيقة باش تكون العملية فالمستوى المطلوب، الشي اللي خلى التدخل يدوز فظروف مزيانة وبوتيرة سريعة
العملية عرفت حضور ممثلي الجماعة القروية لبوميةإلى جانب أعوان السلطة وأعضاء لجنة اليقظة المحلية و كذلك ممثلي المكتب الوطني للماء الصالح للشرب ببومية و كذلك الشركة المشرفة على مشروع اعادة تهيئة ماء الصرف الصحي ، اللي جندوا مجهوداتهم و ألياتهم كاملين باش يتفتح المجرى ويتزالو العوائق اللي ممكن تعرض الساكنة لخطر لا قدر الله.
هاد الخدمة لقات استحسان كبير عند الساكنة، اللي شافت بعينها أن السلطات المحلية كتخدم بعقلية القرب و روح الوطنية وما كتسناش وقوع الكارثة باش تتحرك.
تحية خاصة للسيد باشا باشوية بومية على حضوره الميداني، وحسن تدبيره، وسرعة تدخله، وتحية كذلك لجميع المتدخلين اللي ساهموا فهاد العملية اللي الهدف منها واحد سلامة المواطن قبل كل شيء.
