مصيبة أخرى …خمسة أطباء هما لبقاو في المستعجلات ديال المستشفى الحسن الثاني بسطات

مع هاد سبيطار ديال الحسن الثاني مغاديش نساليو من المشاكل ديالو ، توصلت مجلة 24 بمعلومة دقيقة من مصدر رفض الكشف عن إسمه أن قسم المستعجلات غادي يبقى فيه غير 5 أطباء ديال المداومة على هاد الحساب . طبيبة دفعت شهادة طبيبة وأخرى كونجي والباقي كيخدمو الأوقات ديالهم ، مع العلم ان هاد المرفق ديال قسم المستعجلات خاصو يكونو فيه 8 ديال الأطباء ، وبسب هدا التسيير العشوائي كلشي طالع ليهم الدم ، يعني شي خدام وشي كياكل في الفلوس باردة .

نرجعو صلب الموضوع قسم المستعجلات صعيب يخدم فيه طبيب واحد بالليل ومعاه السطاجير راه العديد من الحالات ماتو بسب نقص في الموار البشرية والاهمال ، راه لايمكن طبيب واحد يقابل إقليم على قدو فيه 46 جماعة وعاد المناطق الأخرى لي كترسل ليه ، القضية غاديا وتزير في هاد السبيطار راه في أي لحظة غادي تنهار المنظومة الصحية كاملة داخل المستشفى ، وساكنة سطات غير راضية على الوضع الحالي ، خاص المندوب الاقليمي والعامل ديال سطات يديرو شي حل قبل تخرج الامور على السيطرة .
وهاد الشي لي خلا بعض الأطباء كلشي باغي يهرب من هاد السيبطار ، دبا عامين وسبيطار معندوش مدير إداري كيفاش القضية واش هاد الإقليم معندوش برلمانيين ولاشي مسؤولين عندهم الجرأة ويهدرو على الوضعية .
الحاصول غادي تبقى دار لقمان على حالها الى أن يرث الله الارض ومن عليها .
انتهى الكلام الى مقال أخر